Togafitiga

O le kanesa o le susu e mafai ona togafiti i togafitiga nei: o le taotoga (surgery), ave malolosi o le uila/fagauila (radiation treatment), ia ma tui ma fualaau (chemotherapy). O togafiti e ono fa’aaogaina e fuafua i tulaga nei:

  • le kanesa ua afaina ai le susu; ituaiga (type), tele (size), pe ua sosolo pe leai (stage of cancer)
  • le tausaga po’o le matua o le tama’ita’i, o le malosi ma le maloloina o le tino, o le faitalia ma le fa’aiuga a le tamatai.

Taotoga

O le togafitiga muamua o le kanesa o le susu e masani lava o le taotoga (surgery). O le taotoga lea o le susu e ono aofia ai ma vaega ua taua o glands i lalo ifo o aoao (axillary lymph nodes). O le fula o le lima, e mafua pe a o’o le sosolo o le kanesa ona ua poloka ala vai (lymph ducts/nodes). Manatua o lymph nodes i lalo ifo o aoao e pito latalata i susu. O lymph nodes nei e mafai ona latou fa’asoloina pe pasi atu le kanesa mai le susu i i si totoga o le tino. O suesuega fa’apitoa o le vaega o le susu ua maua i le kanesa fa’atasi ai ma lymph glands e fuafua i ai pe toe manaomia nisi togafitiga pe a uma le taotoga. Silasila ane i le ata o lo’o i le itulau 11 o lo’o i ai fa’asinoga o lymph nodes o le susu.

Tipieseina o le susu atoa 

Taotoga e aveeseina ai le kanesa ae tumau foliga o le susu (pe a vave ona maua le kanesa)


Taotoga e siaki lymph nodes e ono sosolo ai le kanesa

O le taotoga lea e siaki ai po’o gafea tonu le lymph node(s) e lalata i le vaega o le susu ua maua i le kanesa. E fia iloa vaega ia aua o lymph nodes nei e muamua ona aveese mai sele ua maua i le kanesa ma sosolo atu i i si totoga o le tino. A fai ane le taotoga lenei ua maua ai ni sele ua maua i le kanesa, e toe manaomia ona toe faia nisi taotoga.

Image: A women being prepared for radiation treatment.

Fagauila

O le togafitiga ua taua fa’aperetania o le radiation treatment, o le togafitiga lea e fa’aaoga ai ave malolosi o le uila po’o le fagauila e tape pe fa’aleaogaina ai sele ua maua i le kanesa. O le igoa o le masini e fa’aaoga mo lenei togafiti e taua lea o le ‘Linear Accelerator’. E muamua ona oulua feiloai ma le foma’i e fa’atalatalanoa le togafitiga. E fuafua ma le fa’aeteete le togafitiga ina ia aua nei afaina sele lelei (normal cells) o le tino. E manaomia ai lou asiasi atu mo le fa’atinoina o le CT scan aua le tapenaga ma le fuafua lelei o le vaega tonu o le susu e fa’atino ai le togafitiga.

E fa i le lima aso o le vaiaso e fa’atino ai le togafitiga ma fa’aauau ai mo le fa i le lima vaiaso. E na o ni nai minute le umi e fa’atino ai le togafitiga e tasi, e te le lagonaina se tiga.

E mafai fo’i ona fa’aaoga le fagauila mo kanesa ua toe tutupu (recurrence) po’o le ituaiga kanesa e le mafai ona taoto e aveese le patu. O le autu ia taofiofi le kanesa mai le tupu ma fa’aitiitia ona auga. E manaomia ai lou asiasi atu i le falemai mo sina vaitaimi.

Vailaau fa’apitoa mo le kanesa (Chemotherapy)

O le togafiti lea e fa’aaoga ai vailaau. O le autu o le togafiti lenei e tape ai sele (cells) ua maua i le kanesa ma le fa’aeteetega ia aua nei tele se afaina o sele lelei (normal cells) o le tino. O vailaau nei e tui i alatoto (intravenous) ma fa’asolo atu ai i le tino atoa. O nei vailaau fa’apitoa (chemotherapy) e mafai ona o’o i itutino uma o le tino (systemic), e ese mai i le taotoga (surgery) ma le ave o le uila/ fagauila (radiation treatment) e togafiti na o le vaega (local) o le susu o lo’o tupu ai le kanesa. E tele ituaiga vailaau eseese po’o tuufa’atasiga o vailaau fa’apitoa e fa’aaoga mo le kanesa o le susu. O le tele e i ai le ituaiga ua taua o le anthracycline, e aofia ai doxorubicin (Adriamycin). Afai e tele le afaina o le sosolo o le kanesa, e aoga tele la le chemotherapy, e ono fa’aaogaina taxanes, pei o paclitaxel (Taxol). O le togafitiga lenei e ta’i tolu vaiaso ma fai ma fa’aauau ai mo ni nai masina. E talatalanoa atu pea lau fomai o le kanesa (medical ongologist) i tulaga uma a’o fa’agasolo au togafitiga.

Tulaga fa’a-le-lelei (side effects) e ono tulai mai i le chemotherapy

O tulaga fa’a-le-lelei e ono tulai mai i le chemotherapy e fuafua lava i le ituaiga vaila’au o fa’aaogaina.

  • Tele le afaina e a’afia ma pueia ai i fa’ama’i pipisi. O vailaau
  • o lo’o fa’aaogaina mo togafitiga, e fa’aitiitia ai le malosi o lou tino e tete’e atu siama.

A lagona le fa’avelavela ma le le malosi (38 tikeri ma luga atu le fiva), aua e te fa’atuai ona va’ai le foma’i, ia vave ona e saili togafiti. Fa’afeso’otai foma’i fa’apitoa o le kanesa ma teine tausima’i, ma fa’atino loa fautuaga o lo’o tuu atu mo oe.

  • Toulu le laulu ae mafai ona toe tutupu. E mafai ona e mauaina se fesoasoani e fa’atau ai le laulu fa’apipi’i.
  • E tiga le gutu po’o le fofoga.
  • E lagona le vaivai ma le le-lava.

Ua le alu le ma’i masina (menstrual cycle) pei ona masani ai i masina taitasi. E taua tele le fa’aaogaina o se aiga-fuafuaina (contraceptive) fa’amoemoeina ma le saogalemu ina ia puipui mai ai le ono maua i le maitaga ao feagai ma togafitiga o le kanesa.

Togafitiga ua tau’a o Hormones

O le tele o kanesa o le susu e foliga mai e i ai le a’afiaga ma le so’otaga ma nisi ituaiga o porotini e fausia lava e le tino ua taua fa’aperetania o hormones. O nisi o nei hormones e taua i le fa’aperetania o le estrogen ma le progesterone. Mo tama’ita’ ua maua i le kanesa o le susu o lo’o faia pea le ma’i masina (pre-menopausal), o le a talafeagai i ai le fuala’au lea o le Tamoxifen. E mafai ona taofi pe fa’aititia le fausiaina e le tino o nei hormones i le faia lea o le tui e ta’i fa vaiaso ma fai, ua taua o le goserelin (Zoladex). E mafai foi ona ta’oto le tina e ave’ese fua fanau (ovary/ovaries) ona o vaega ia o le tino e fausia mai ai hormones nei. E mafai ona toe foi le ma’i masina (menstrual period) o le tama’ita’i i le tulaga masani (pe a le’i aveeseina fua fanau) pe a taofi le fa’aaogaina o le goserelin. Mo tama’ita’i ua latou le toe faia le ma’i masina (post-menopausal) e latou te fa’aaogaina fualaau ua taua o le tamoxifen, pei o le anastrozole (Arimidex), o le letrozole (Femara) po’o le exemestane (Aromasin). O fualaau nei e latou te taofiofi le fausia o hormones i le tino.

Ua na o a’u o se tagata

O a’u foi o se fafine

Fesoasoani mai

Ia ou iloa lo’u tagata po’o ai

Fa’asino mai le ala, ou te a’e ai

Mo lo’u lelei, fa’asino mai nei

le mea ou te fai

Ia fa’asoa mai aso Iesu pele

Ou te aioi atu ai

Aumai o le malosi i aso ta’itasi

E fa’atino ai mea e tatau ona ou fai

Ua mavae atu ananafi Iesu

O taeao ou te le mautinoa

Le Alii e, fa’asino mai le ala

Fesoasoani mai

Translation of the first verse and chorus of “One Day at a Time”

Fa’aiuga mo togafitiga

Atonu o le a faigata ona fai sau fa’aiuga mo le togafiti e talafeagai mo lou kanesa ona o le tele o fa’amatalaga eseese i se taimi utiuti. E lagona le fia maua vave o se tonu mautu

i le mea e tatau ona fai. Ae peitai, e taua tele ona fuafua lelei lau fa’aiuga ae aua le fa’atopetopeina ina ia mautinoa lelei, o se fa’aiuga ua talafeagai ma alagatatau mo oe.