Talatalanoaga ma Tauaneai

Interviewer: O le a lau tali atu ina ua fai mai le fomai ua maua oe i le kanesa?

Tauaneai: Sa ou fesili po’o le a le mea e fai? Fai mai e tatau ona ou alu e fai le scan ma le biopsy e fa’amautinoa ai ua maua a’u I le kanesa. Na ou alu lea I le falemai I le Hutt, o iina sa fai uma ai a’u siaki. Ae maua ane a’u results ua confirm ua maua au I le kanesa o le susu. Sa refer loa a’u i le surgeon. Sa faimai lea e aveese muamua le patu. Na ou taoto ai lea I le po e aveese le lump. Na ou tea I tua i le fale i le taeao ae toe vili atu [le fomai] ou te sau ma te talanoa ona o lea ua maua mai le iuga o suesuega sa fai, e le’i uma ona aveese le kanesa mai lo’u susu. O’u sau lea faimai le foma’i e manaomia lo’u toe taoto e toe aveese i si vaega (tissue) o le susu ua maua i le kanesa. Ona ou faiatu lea i ai e leai la, e sili ai pe a aveese uma lo’u susu. Sa toe book ai loa lo’u taotoga ma aveese uma ai lo’u susu [ua afaina i le kanesa] Faimai loa ua uma ona ave ese le vaega o le susu ua afaina e aofia ai, pe lua ea ni lymph nodes. Ona ou te’a lea i le fale, ae e o atu lava nai teine [nurses] e asiasi atu ma sui la’u fusiga fa’atasi ai ma la’u drainage.

O a ni fa’afitauli sa feagai ma oe i le taimi o togafitiga?

Ou te fa’afetai lava i le alofa o le Atua, aua e leai lava se mea na ou fa’alogoina, e oo i se tiga. I just focused myself on getting well, I kept telling myself that everything will be alright. E leai lava ma so’u popole, ma talanoa ma le fomai faimai ua uma [togafitiga], ia po’o a lava la mea e faimai e fai ou te fiafia lava e fai. O le toaga lava e tausi i meaai lelei ma lava le vai inu. E leai se fa’afitauli tele na ou maua ai. I just focused and on getting better. 

Ao feagai oe ma le ma’i, o ai sa maua ai lou fa’amalosiau ma le fesoasoani?

Na o mai uma lava la’u fanau, o ou cousins, o o’u aiga, o faifeau ma tagata o le au lotu. O nai a’u uo matutua, fa’amalosi mai lava. E leai so’u lagona o se mai. Ou te fiafia lava e ai [tausami], ou te fiafia foi e savali...

I le taimi na fai ai au togafitiga, o a ni mea na fa’amalosiau ia te oe ma maua ai pea lou malosi?

Sa ou fa’alogologo po’o a ni auga o le ma’i ou te lagona, ae e leai lava ni lagona po’o ni suiga ou te fa’alogoina, pe e i ai se lagona o se [vaega o le tino] e tiga, e leai lava. E ofo le fomai ma fesili mai [ona o lo’u malosi], ae ou faiatu, I focused that I am well. Aua o lea lena a e fa’atutu i ai ma fefe I le ma’I, e atili ai ona e fa’alogo atu pei ua afaina ai le mafaufau ma le tino ini tulaga le lelei. Aua o le tele lava o tagata e fa’alogologo i le tiga ia ma atili ai lava le mai. Ou te le mana’o foi e faimai ni tagata ia te a’u a mea ua e ma’i, aua o lea ou te lagona lava e a’u ou te le ma’i.

Ina ua iloa e lou aiga ua e maua I le kanesa, o le a se latou tali mai?

O latou uma pei ua feel sorry [mo a’u], fa’apea ua maua loa i le cancer fa’apea ‘ia ua leai se aoga ua mai’. Ae o a’u ma lo’u mafaufau, ua aveese le mea na ou ma’i ai, o lea ua ou malosi. Ae e lagona lava lo’u fa’anoanoa ona e o mai tagata ma talanoa pei o le a ou oti. People talk as if I am going to die and here I am, I want to live, I didn’t want to hear that. I needed that extra support, but to treat me like I’m going to die…

O [le talitonuga] a nai o tatou tagata, e maua loa se i si i le kanesa, faimai loa ua leai se aoga, ua ma’i. Ae o a’u ia, na faimai loa le fomai e aveese le kanesa ma uma ai loa. O nisi o tagata ua fa’ama’amulu ma give up. E i ai foi se i si o uso na maua foi i le ma’i, ae na maua loa alu loa aveese. O lea la ua malosi lava.

I le taimi a’o fai a’u chemo, e uma loa o’u alu i le fale, saka la’u talo ma fai la’u meaai. E fai lava e a’u la’u meaai. Ou te le fa’amoemoe i se tasi e fai au feau. E taumafai lava si a’u fanau e fesoasoani, ae ou te alu lava au e fai au feau, e lelei e exercise ai lo’u lima. Ou te alu velevele le vao, fai a’u tagamea, ou te le fa’amoemoe i se i si, e fai lava a’u feau.

Na lagona sou ma’i i le taimi na fai togafitiga?

O le taimi na fai ai a’u chemo, ou te foi mai i le falemai fai sa’u taoto pe a lagona le vaivai (tired). A fai fo’i ni a’u feau laiti ae lagona le lelava, ia o’u alu taoto i le sofa e fai sina moeiini laititi, toe ala ane ua maua foi le malosi. Ae a ou fa’alogo atu foi lea pei ua pe le vae, ia ou tu atu o’u alu savali. Ou te le fa’atu’utu’u i ai aua a fa’atu’utu’u i ai [I lagona o le ma’i] ua atili ai le fa’alogo atu pei ua mai ma pei ua afaina ai lou mafaufau. I le taimi e uma ai le chemo, e lagona e pei e mamafa le tino ma pei e mainiini lou lima. So I just lie on the sofa and watch TV, ma fai sina a’u malologa laititi. O nisi fo’i o taimi ou te alu fai a’u fa’amalosi tino laiti. Ae ou te le fa’amoemoe lava i isi e fai galuega mo a’u. Just focus on getting better and you will get better. E fai lava a’u tatalo ma fa’amoemoe i le Atua

Sa fa’afefea ona maua le cancer o lou susu?

O se I si o a’u uo I Newtown, na sau faimai e mate o e fai le fa’ata o le susu. Ae maua ane le fa’aiuga ua maua lo’u susu i le kanesa. Na ou fa’apea, ua leai foi se mea na ou alu ai ua maua ai le kanesa. Ae ina ua uma na fai le fa’ata, ou vaai atu I le susu pei ua sau ai se suavai, o ina la na ou alu ai vaai la’u fomai.

E i ai ni feau taua e te fia fa’asoa atu i nisi o tina Samoa e uiga i lenei gasegase?

O le mea muamua ma le taua o le fai o le siaki po’o le breast screening. A fai ane le faata ua maua ai se lump [I le susu], aua le fefe, alu e fai au togafiti, fai uma lava mea e faimai ai le fomai. O le i si itu, e tatau lava ona tele lou fa’atuatua, aua o nisi o le tele lava o le fefe ma le palaa’i, ia ae o mea uma o lo’o fai e fesoasoani mo oe e te toe malosi ai. A fa’apea e te maua i le kanesa, e le fa’apea ua leai se fa’amoemoe, e mafai lava ona togafiti ma toe maua le malosi.

Ou te toaga foi lava e tausi i a’u meaai. E le misi la’u talo, aua e to’a ai lou manava. O nisi foi o side effects o le chemo o le diarrhoea, ia ou te le’i maua ai lava, aua sa ou fiafia e ai la’u talo. O i si taimi pei ua oona meaai, ua leai se manogi, ae fa’amalosi e tausami, toaga e tuu i ai ni mea manogi eseese e fa’amanogi ai meai. Ia toaga lava e ai.

A toaga e tatalo ma fa’atuatua i le Atua e toe fa’afoi le malosi. Ia lava le fa’atuatua tu’u pea i le Atua.

Ou te fautua lava a’u ia aua nei faia se fofo. O nisi ua maua ane le kanesa ua tuai, ua le mafai e togafiti a le falemai na toe fa’afoi le malosi, ua tuai ona togafiti.