Sailiiliga o le kanesa o le susu

Auga ma suiga vaaia o le susu 

E pei ona taua i luga, e i ai suiga e oo i susu o le tama’ita’i ao tuputupu o ia e avea ma tagata matua. O nisi o nei suiga po’o fa’alogona, o suiga masani e tatau ona o’o i susu i le taimi e fai ai le ma’i-masina o le tama’itai. Ae peitai, o nisi fo’i o nei suiga o ni fa’ailoga vaaia lea o le susu ua afaina i le kanesa. Ona o le taitutusa o fesuiaiga po’o fa’alogona nei, e ono fa’afaigata ai ona iloa ua amata ona afaina le susu i le kanesa. O nisi o suiga ua taua i lalo o suiga po’o auga ma fa’ailoga vaaia ia o le susu ua ono maua i le kanesa:

  • o se patu po ni patupatu i le susu
  • o suiga i le matasusu (nipple), ua tafe mai se toto (pe filogia) i le matasusu
  • ua mafiafia le pa’u o le susu
  • o ni fuafua ua ni’i i le susu
  • ua sui le vaai i le ta’atia mai o le susu
  • lagona le tiga i se vaega o le susu
  • pata ma mumu le susu.

E le fa’apea a lagona ma vaaia suiga nei ua mautinoa ua maua lou susu i le kanesa. Ae taua tele le vaai pea o lau fomai i so’o se suiga e aliali mai i le susu. A tulai mai se suiga i lou susu, e ono fai ni au siaki e lau lava fomai po’o le feso’otai atu loa i fomai fa’apitoa o susu.

Su’esu’ega

Seseleina (biopsy) o se vaega o le patu (tumour) mo suesuega

O le tele o taimi, e mana’omia ai le fa’atino o le suesuega ua taua o le biopsy. O se tasi lea o suesuega e fa’amautinoa ai pe ua maua lou susu i le kanesa. O le biopsy, o le seseleeseina lea o sina vaega o le patu (lump) i le susu po’o le tipi eseina atoa o le patu atoa mo suesuega. O fa’aiuga mai nei suesuega e fuafua i ai le togafiti e sili ona talafeagai mo oe. O fa’amatalaga foi mai nei suesuega e fai ai le fa’aiuga a le fomai po’o se kanesa fa’atoa tupu, po’o se kanesa ua tele lona sosolo i totonu lava o le susu pe ua sosolo atu foi i isi totoga o le tino (secondary/metastasis). E fa’avasega i vaega (staging) le tele o le sosolo o le kanesa.