O ou susu

O susu o le tama’ita’i ua fa’apitoa mo le gaosia o le suasusu aua le fafagaina o le pepe pe a fanau mai. O aano o le susu e aafia ai vaega e lata ane i le ponaivi o le tauau i luma (collar bone) ma le aoao (armpit) i lou itu. I lalo ifo o susu o lo’o i ai musele (muscles) ma ivi asoaso (ribs). O vaega o le aano o le susu ua fa’aigoaina o taga-susu (milk sacs or lobules) o vaega ia o le susu e fausia ai le suasusu. O vaega ua taua o ala-susu (milk ducts) o vaega ia o le susu e fa’asoloina le suasusu i le matasusu.

O le so’otaga o ou susu ma ou aoao, o lo’o i ai nisi o fesootaiga o le tino ua taua fa’apalagi o lymph glands po’o nodes e pei o ni patu e fesootai i vaega ua taua o lymph ducts.

O lymph glands/nodes ma lymph ducts, o fesootaiga nei o le tino ua taua o le lymphatic system e fesoasoani e fa’amama le tino ma tapeina siama e ono osofaia le tino ma ono tutupu mai ai fa’amai pipisi. E taua tele galuega a lymph nodes i le tino o le tagata aua latou te fa’amamaina totoga e pei o susu. O ala vai (lymph ducts) ma lymph nodes nei e sosolo atu ai le kanesa i isi totoga o le tino.

E le tumau susu o le tama’ita’i i se tulaga e tasi. E i ai suiga e maua ai susu o le tama’ita’i a’o tuputupu o ia e avea ma tagata matua. O nei suiga e ono tutupu i le vaitausaga lea e amata ai le ma’i masina (menstrual cycle) o le tama’ita’i, pe ua o’o foi i le vaitaimi ua avea ai ma tina ma ua maua i le maitaga o tina.

I le taimi o le ma’i-masina o le tama’ita’i, e fa’alogoina le gaoi pe lagona ni patupatu i le susu. O nei suiga ma fa’alogona o ni suiga talafeagai mo lea taimi, ae a uma fo’i le ma’i masina ona toe fo’i lava lea o susu i ona tulaga masani.